Digjet një person brenda shtëpisë në Deçan

Ilustrim @pixabay

Një person ka vdekur në qytetin e Deçanit, pasi thuhet se është djegur (karbonizuar), pas përfshirjes së shtëpisë nga zjarri.

Policia i ka thënë KOHËS se rasti ka ndodhur të premten, në orën 06:35, në fshatin Lloqan-Deçan.

“Me të marrë informatën, Policia dhe zjarrfikësit kanë dalë në vendngjarje dhe gjatë intervenimit nga zjarrfikësit është vërejtur se një person është brenda i djegur (i karbonizuar), vdekja e viktimës është konstatuar nga ekipi mjekësor”, thuhet në njoftimin policor.

Në vend të ngjarjes thuhet se kanë dalë njësitet kompetente dhe me urdhër të prokurorit, trupi i pajetë është dërguar në Institutin e Mjekësisë Ligjore në Prishtinë për obduksion. Rasti po cilësohet si ‘hetim i vdekjes’.

Për rastin ka reaguar edhe kryetari i Deçanit, Bashkim Ramosaj, duke shkruar se lajmi për vdekjen e personit është i rëndë dhe pikëllues.