‘Faleminderit, Shqipëri, nuk do të harrojmë”, veprat artistike të afganëve në Shqipëri

Artistët afganë kanë zgjedhur të vizatojnë vepra arti nëpër Shqipëri, si shenjë mirënjohje e falënderimi për mikpritjen shqiptare në kohën kur atyre po u cenohej ekzistenca, pas rënies së Afganistanit nën kontroll të talebanëve.

“Faleminderit, Shqipëri, nuk do të harrojmë!”, shkruhet mes tjerash në mural, ku paraqitet një burrë afgan që po punon, ndërsa karroca e tij e punës mban hartën e Shqipërisë.

Artistët janë pjesëtarë të ‘Artlords’, një organizatë afgane me aktivistë e artistë vullnetarë, të cilët përmes pikturave murale përcjellin mesazhe shprese dhe paqeje. E këto mesazhe u bënë edhe lajme ndërkombëtare.

Bashkëthemeluesi i “Artlords”, Omaid Sharifi, thekson se “kjo është një nga mënyrat me të cilat ne duam të ngremë zërin për afganët që janë marrë peng në shtëpitë e tyre në Afganistan”.

Sipas tij, shumica e veprave të këtij grupi në Afganistan u shkatërruan nga talebanët.

Ata u vizituan nga ministrja për Evropën dhe Punët e Jashtme, Olta Xhaçka dhe kryebashkiaku i Tiranës, Erion Veliaj.

Shqipëria ishte ndër vendet e para që strehoi mbi 2,400 afganë.