Më mirë të binden të pavaksinuarit që të vaksinohen sesa të jepet vaksina e tretë

Në njësitë e kujdesit intensiv të vendeve që kanë filluar tashmë fushata të gjera përforcuese, ka kryesisht njerëz të pavaksinuar

Organizata Botërore e Shëndetësisë (OBSH) tërheq vërejtjen kundër shikimit të vaksinave përforcuese si një ilaç çudibërës në rrugën e daljes nga pandemia.

Në të njëjtën kohë, ajo shprehet kundër vaksinës së tretë (përforcuese) për popullatën e shëndoshë. Kjo për faktin se do ta bënte edhe më të vështirë furnizimin e të gjithë botës me vaksinat e para dhe të dyta.

Në vend që të vaksinohen për herë të tretë njerëzit e shëndetshëm, shtetet duhet të bëjnë më shumë përpjekje për të arritur të pavaksinuarit, në vendin e tyre dhe në pjesën tjetër të botës. Kështu ka thënë të hënën në Gjenevë shefi i OBSH-së, Tedros Adhanom Ghebreyesus.

Prandaj, çështja e vaksinimeve përforcuese lidhet drejtpërdrejt me çështjen e një shpërndarjeje të drejtë të vaksinës.

OBSH ka paralajmëruar për muaj të tërë se variante të rrezikshëm të virusit mund të zhvillohen në vendet, popullsia e të cilave nuk është e vaksinuar në mënyrë adekuate.

“Nëse nuk përpiqemi të vaksinojmë të pavaksinuarit, mund të mos arrijmë qëllimin e dëshiruar”, tha Tedros. Në njësitë e kujdesit intensiv të vendeve që kanë filluar tashmë fushata të gjera përforcuese, ka kryesisht njerëz të pavaksinuar.

---