Franca fillon vaksinimin e fëmijëve 5-11 vjeç

CDC

Në Francë ka nisur të mërkurën vaksinimi i fëmijëve nga 5-11 vjeç. Ministri i Shëndetësisë, Olivier Véran, tha se qendrat e vaksinimit ishin gati për të nisur pa humbur kohë vaksinimin e fëmijëve të kësaj grupmoshe.

Nisma vjen pasi Komiteti i Etikës në vend miratoi javën e kaluar vendimin për vaksinimin e kësaj grupmoshe, e cilësuar si vulnerabël ndaj virusit.

Rreth 90% e të rriturve francezë janë plotësisht të vaksinuar, si dhe mbi tre të katërtat e fëmijëve të moshës 12 deri në 17 vjeç, sipas të dhënave të Ministrisë së Shëndetësisë.

Ministri i Shëndetësisë tha se pavarësisht situatës, fëmijëve 12-17 vjeç nuk do t’u injektohet një dozë e tretë.

Të rriturve në Francë u duhet të paraqesin një pasaportë vaksinimi ose test negativ nga COVID-19 për 48 orët e fundit, në mënyrë që të lejohen të frekuentojnë baret, restorantet, sajtet kulturore apo transportin publik në distanca të largëta.

Qeveria franceze nuk ka marrë deri tani ndonjë masë shtesë pas përhapjes së variantit Omicron të COVID-19.