Kantoni i St. Gallenit shlyen mbi 8000 certifikata false të vaksinimit

Falsifikuesit dhe blerësit e certifikatave do të përballen me gjoba të larta sepse bëhet fjalë për falsifikim dokumentesh

Kantoni i St. Gallenit ka anuluar dje mbi 8000 certifikata vaksinimi që ishin lëshuar në mënyrë të paligjshme. Në të njëjtën kohë, prokuroria publike po heton rrjedhën e ngjarjeve, transmeton albinfo.ch. Kështu, falsifikuesit dhe blerësit e certifikatave do të përballen me gjoba të larta sepse bëhet fjalë për falsifikim dokumentesh.

Falsifikuesit kanë kërkuar shuma të mëdha parash nga “klientët” e tyre, shkruan srf.ch. Ata punonin në qendra private testimi dhe kështu kishin akses në sistemin kombëtar të lëshimit të certifikatave, thuhet më tutje në njoftim.

Kantoni i St.Gallenit i ka tërhequr vërejtjen tashmë disa herë Qeverisë Federale se sistemi i IT-së për aktivizimin e certifikatave ka mangësi të konsiderueshme dhe u jep shumë njerëzve mundësinë për të lëshuar certifikata të paligjshme vaksinimi.

Është gjithashtu e rëndësishme të theksohet se të dyshuarit nuk kanë punuar në një qendër kantonale vaksinimi, siç është përmendur më parë.

Stafi i qendrave kantonale të vaksinimit nuk ka qasje në sistemin për lëshimin e certifikatave.

---