84 për qind e zviceranëve duan të votojnë në mënyrë elektronike

Për të realizuar këtë sondazh, Deloitte ka anketuar 1000 veta midis moshës 18 dhe 81 vjeç nga zonat urbane dhe rurale në pjesët gjermano-folëse të Zvicrës

Sipas një sondazhi përfaqësues, 84 për qind e zviceranëve do të dëshironin të votonin në mënyrë elektronike. Një shumicë e madhe kërkon gjithashtu oferta të standardizuara nga shteti dhe jo nga kompanitë private.

Pandemia e koronavirusit ka rezultuar të jetë një katalizator për dixhitalizimin, shkruan kompania e auditimit dhe konsulencës së Cyrihut Deloitte në sondazhin e saj të publikuar të martën, transmeton albinfo.ch. Përveç shtimit të blerjeve online dhe e-banking, zviceranët kanë përdorur gjithnjë e më shumë shërbimet dixhitale të ofruara nga autoritetet që nga fillimi i pandemisë.

Sipas anketës, 38 për qind e të rriturve të pyetur kanë praktikuar një hapje më të madhe ndaj shërbimeve të qeverisjes elektronike gjatë kësaj kohe, shkruan agjencia e lajmeve, sda.ch.

Në të njëjtën kohë,  21 për qind e të anketuarve thonë se besimi i tyre në shërbimet dixhitale të ofruara nga autoritetet kishte rënë gjatë pandemisë, shumë më tepër se në sondazhin e Deloitte të vitit të kaluar (kur ishin vetëm 7 për qind). Shumë nga të pyeturit përmendin sigurinë kibernetike dhe mbrojtjen e të dhënave si arsye kryesore për një gjë të tillë.

Pro shërbimeve shtetërore

Ashtu si në sondazhin e vitit të kaluar, një shumicë e qartë prej 73 për qind do të donin që autoritetet të ofrojnë shërbime uniforme në të gjithë Zvicrën. 86 për qind e të anketuarve duan gjithashtu që shërbimet dixhitale të ofrohen nga një agjenci qeveritare dhe jo nga kompanitë private, transmeton albinfo.ch. Vetëm 8 për qind e njerëzve të anketuar nuk shohin ndonjë vlerë të shtuar në shërbimet dixhitale të ofruara nga autoritetet.

Të anketuarit, në mesin e avantazheve të shërbimeve dixhitale nga autoritetet publike përmendin: thjeshtësinë (68 për qind), kursimin e kohës (72 për qind), fleksibilitetin në aspektin e vendndodhjes (72 për qind) dhe fleksibilitetin për sa i përket kohës (75 për qind).

Një shumicë e qartë e të pyeturve do të donin gjithashtu shërbime të reja. 84 për qind thonë se do të donin të porosisnin një pasaportë ose letërnjoftimi në mënyrë dixhitale, pa u detyruar të shkojnë në zyrën e pasaportave.

Për të realizuar këtë sondazh, në shtatorin e kaluar, Deloitte ka anketuar 1000 veta midis moshës 18 dhe 81 vjeç nga zonat urbane dhe rurale në pjesët gjermano-folëse të Zvicrës.

---