Kurti thotë jo, Borrell kërkon që referendumi serb të lejohet në Kosovë

Qytetarët serbë në Kosovë duhet të jenë në gjendje të votojnë. Kështu është shprehur përfaqësuesi i lartë i Bashkimit Evropian për Politikë të Jashtme dhe Çështje të Sigurisë, Josep Borrell, duke iu referuar referendumit të Serbisë për ndryshimet kushtetuese që mbahet të dielën.

Sipas tij, në të kaluarën mbledhja e votave është bërë përmes lehtësimit të OSBE-së.

“Kam folur me kryeministrin e Kosovës, Albin Kurti dhe presidentin e Serbisë, Aleksandar Vuçiç, në lidhje me referendumin për Kushtetutën që organizohet të dielën në Serbi. Mbledhja e votave në të kaluarën është bërë përmes lehtësimin të OSBE-së. Qytetarët duhet të jenë në gjendje të ushtrojnë të drejtën e tyre për të votuar”, shkruan Borrell.

Megjithatë, Kurti e ka bërë të qartë qëndrimin e Qeverisë së Kosovës, se nuk mund të ketë referendum në Kosovë, por serbët me shtetësi të dyfishtë mund të votojnë me postë ose në zyrën ndërlidhëse në Prishtinë.

Serbia, më 16 janar, do të mbajë referendum për ndryshimet kushtetuese që kanë të bëjnë me fushën e drejtësisë.