Ekspertët: A duhet të imitojë Zvicra Spanjën në menaxhimin e pandemisë?

(KEYSTONE/Salvatore Di Nolfi)

Pasi Spanja ka shpallur se dëshiron të ndalojë numërimin e normave ditore të infeksionit dhe në vend të kësaj ta trajtojë Covid-in në të njëjtën mënyrë si një grip sezonal, me mbikëqyrje selektive, disa ekspertë zviceranë thanë se e mbështesin këtë qasje, njofton albinfo.ch.

Valérie D’Acremont, një specialiste e sëmundjeve infektive në Universitetin e Lozanës, beson se Zvicra duhet të ndjekë strategjinë spanjolle dhe të miratojë të njëjtin sistem monitorimi, siç e ka tashmë në fuqi për numërimin e rasteve të gripit.

Ajo shtoi se futja e një strategjie më të thjeshtë “shpesh kërkon më shumë guxim politik sesa forcimin e saj”.

Kjo qasje e re do të sinjalizonte kalimin nga një gjendje pandemike në atë endemike, që do të thotë se sëmundja gjendet zakonisht në popullatë dhe evolucioni i saj është bërë i parashikueshëm.

Ministri i Shëndetësisë, Alain Berset, ka përmendur së fundmi këtë tranzicion “nga një fazë pandemike në një fazë endemike, me nivele të larta të imunitetit të arritur tashmë” në Zvicër.