Escobar e Lajçak përcjellin mesazhe të qarta për dialogun Kosovë-Serbi

Ata u pritën në Kosovë nga krerët më të lartë të shtetit

Zëvendësndihmësi i sekretarit amerikan të Shtetit për Evropën dhe Euroazinë dhe përfaqësuesi special për Ballkanin Perëndimor, Gabriel Escobar, gjatë vizitës në Prishtinë ka bërë thirrje për vazhdimin e dialogut me Serbinë, transmeton Albinfo.ch.

Në një konferencë për media me kryeministrin e Kosovës, Albin Kurti, diplomati amerikan ritheksoi mbështetjen e plotë të SHBA-së për pavarësinë e Kosovës dhe integritetin territorial.

“Nga perspektiva amerikane, dua të them se SHBA-ja e përkrah plotësisht pavarësinë e Kosovës, integritetin territorial të saj. E keni treguar se jeni partner solid, mik i mirë dhe ju falënderojmë për këtë. Për Kosovën dhe rajonin, ne e shohim këtë zonë si një mundësi të jashtëzakonshme me energji të jashtëzakonshme. Ju jeni evropianë, ekonomikisht, historikisht dhe kulturalisht jeni evropianë dhe ne kemi punuar me kolegët tanë evropianë për t’u siguruar se ata e njohin që Ballkani Perëndimor është një mundësi e jashtëzakonshme për ta dhe jo rrezik. Në këtë kuptim, ne inkurajojmë të gjitha palët që ta shohin Ballkanin Perëndimor si anëtarë potencialë të BE-së në të ardhmen, që të gjitha ata në paqe me njëri-tjetrin, që të gjithë produktivë dhe anëtarë të aftë, ashtu siç i kemi parë ne si partnerë bilateralë. Shpresa kryesore për këtë është përmes dialogut”, tha Escobar.

Escobar ishte i shoqëruar edhe nga i dërguari i BE-së për dialogun, Mirosllav Lajçak. Ky i fundit tha se kjo vizitë e përbashkët tregon se BE-ja dhe SHBA-ja po punojnë “ngushtë” për dialogun ndërmjet Kosovës dhe Serbisë dhe për vizionin e së ardhmes.

“Jam i lumtur që kjo vizitë veçse ka ofruar një mundësi për të diskutuar për planet tona në javët dhe muajt e ardhshëm me presidenten dhe kryeministrin dhe ne do të vazhdojmë diskutimet tona”, theksoi Lajçak.

---