Kosova heq kushtin për dozën e tretë, fluks në Morinë

Foto nga arkivi

Pas dy javësh pengesa, Kosova ka vendosur që këtë të shtunë të lehtësojë masat kufizuese për hyrjen në territorin e saj, përcjell albinfo.ch.

Këtë të shtunë në pikën kufitare Morinë, ku prej dy javësh kërkohej që për hyrjen në Kosovë të kishte tri doza të vaksinës anti-Covid, sot qytetarët shqiptarë janë lejuar të futen me vetëm dy doza.

“Tri doza vaksine ishte masë e tepruar”, ka thënë një qytetar.

Ndërkohë heqja e dozës së tretë ka sjellë rritje të fluksit të lëvizjes së qytetarëve.

“Ngaqë ka pasur kusht me tre vaksina, nuk kam mundur të shkoj në Kosovë, pasi unë jam vetëm me dy doza. Për banorët e Kukësit është mirë që të kemi lehtësim, pasi shumë nga ne kanë dhe punë”, ka thënë një tjetër.