Kosovë: Ministri i Financave e krahason mbështetjen e qytetarëve me Austrinë e Francën

Ministri i Financave në Kosovë, Hekuran Murati, përmes një postimi në Facebook ka thënë se kanë dyfishuar masën e asistencës sociale për muajt nëntor e dhjetor, si dhe vazhdimin e mbështetjes shtesë për 26 mijë familje për tërë vitin 2022.

“Mbështetjen e 300 mijë pensionmarrësve me një pagesë të njëhershme prej 100 eurosh për muajin nëntor. Masë të ngjashme kishte ndërmarrë edhe Franca, duke mbështetur familjet e varfra me nga 100 euro, pagesë e njëhershme. Rritjen me 11% për pensionet bazike dhe me 33% për personat me aftësi të kufizuar, përkatësisht, për 170 mijë pensionmarrës”.

“Mbrojtjen e 600 mijë amvisërive nga rritja e çmimit të energjisë elektrike, duke ndarë 120 milionë euro nga buxheti. Që mesatarisht i bie se secila amvisëri është mbështetur me 200 euro për të mos lejuar rritjen e papërballueshme të çmimit. Sa për krahasim, Austria ka ndarë nga 150 euro për familje pagesë të njëhershme, për t’i ndihmuar ta përballojnë rritjen e çmimit të energjisë elektrike”, ka shkruar ai.
Në total, si përgjigje ndaj rritjes së çmimeve kemi ndarë rreth 190 milionë euro, vetëm në 4 muajt e fundit.

“Dhe do të vazhdojmë mbështetjen ndaj qytetarëve, sepse kjo qeveri është në anën e qytetarëve. Madje, me nivelin e mbështetjes mund të krahasohemi edhe me shtete shumë më të forta ekonomikisht, si Franca e Austria. Por nëse i pyet opozitën, ata do të thonë se qeveria nuk po bën asgjë. Madje, edhe fajin për rritjen globale të çmimeve tentojnë t’ia mveshin kësaj qeverie”, ka shkruar Murati në Facebook.