Kosovë: Nis iniciativa për rritjen e pagës minimale

Ilustrim

Qeveria e Kosovës ka njoftuar se ka nisur punën drejt rritjes së pagës minimale. Sipas kryeministrit Albin Kurti, ky është një hap drejt përmbushjes së një tjetër zotimi.

“Për vite të tëra punëtorët e sektorit privat janë lënë anash. Me qeverisjen tonë, kjo ndryshon. Atyre do t’ua sigurojmë pragun e të hyrave që u mundëson një jetë të dinjitetshme. Ende pa i mbushur një vit në qeverisje, kemi filluar ndërmarrjen e hapave të nevojshëm drejt rritjes së pagës minimale. Si hap i parë është rregullimi i kornizës ligjore, në mënyrë që të evitohen të gjitha pasiguritë ligjore ekzistuese në lidhje me rritjen e pages minimale. Ministria e Financave, Punës dhe Transfereve veçse ka përgatitur projektligjin, i cili shpejt do të dalë në konsultime publike”, ka shkruar Kurti, transmeton Albinfo.ch.

Krahas kësaj, në koordinim me Këshillin Ekonomiko-Social, sipas tij, së shpejti do të propozohet edhe niveli i pagës minimale.