A do t’u ndalohet deputetëve të Kosovës kompensimi për derivate?

Nga disa deputetë u kërkua që të ndalohet kompenzimi për naftë dhe kafe

Në komisionin parlamentar për buxhet të Kuvendit të Kosovës, sot është diskutuar për kërkesën për caktimin e lartësisë së kompensimit të deputetit për funksion udhëheqës dhe kompensimin e shpenzimeve.

Shefja e Grupit Parlamentar të VV-së, Mimoza Kusari Lila ka thënë se duhet të vendoset një tavan për shpenzimet mujore të një deputeti,

Ajo po ashtu kërkoi që kompenzimet për shpenzimet telefonike të zbriten 50 për qind si dhe të mos ketë kompensime shtesë për deputetët.

Por deputeti i LDK-së, Avdullah Hoti tha se kjo kërkesë është e paqartë, derisa kërkoi nga grupet e tjera parlamentare që të diskutohet më shumë kjo çështje.

Ndërkohë, kryetari i Komisionit, Ferat Shala u shpreh pro idesë së ndalimit të kompensimeve për naftë dhe kafe.

“Nuk është mirë që deputetët t’i mbikëqyrin shumë institucione për shpenzime, e në anën tjetër deputetët të shpenzojnë për derivate pa kontroll. Unë jam që të hiqen kompensimet për naftë dhe kafe”, ka thënë ai.

 

---