Osmani në vizitë zyrtare në Turqi, viziton fabrikën e dronëve

Presidentja e Republikës së Kosovës, Vjosa Osmani në ditën e parë të vizitës në Turqi, ka vizituar Fabrikën për prodhimin  e dronëve “Baykar” dhe ka zhvilluar takime me Bordin e Marrëdhënieve të Jashtme Ekonomike të Turqisë (DEIK) dhe me Odën Tregtare të Stambollit.

Në Fabrikën për prodhimin e dronëve “Baykar”, Presidentja Osmani është njoftuar për arritjet në sferën e avancimit teknologjik dhe inovacionit të ndërlidhur me sektorin e mbrojtjes dhe të sigurisë.

Ndërkaq në takim me Bordin e Marrëdhënieve të Jashtme Ekonomike të Turqisë (DEIK) dhe me Odën Tregtare të Turqisë, Presidentja Osmani ka ftuar bizneset turke për investime në Kosovë, duke e përmendur ambientin e përshtatshëm, infrastrukturën ligjore që i mbron bizneset si dhe kapitalin e jashtëzakonshëm njerëzor që ka vendi ynë.

“Ne synojmë investime të qëndrueshme në të gjithë sektorët, dhe në veçanti në fushën e industrisë ushqimore, bujqësisë, Teknologjisë së Informacionit dhe Komunikimit (TIK), energjisë së ripërtëritshme, turizmit, tekstilit, plastikës, drurit apo metalit”, ka theksuar presidentja Osmani, transmeton Albinfo.ch.

Ndërkaq në takim me Odën Tregtare të Stambollit, Presidentja Osmani tha se ka hapësirë të madhe për t`i eksploruar mundësitë që bizneset kosovare të hyjnë në tregun turk, sikurse edhe anasjelltas.

“Jam këtu për t`ua përcjellë mesazhin se Kosova është një treg i hapur që po kërkoni për investimin tuaj të ardhshëm të madh dhe serioz”, është shprehur Osmani.