Shtëpia e Bardhë korrigjon deklaratën e Bidenit për Putinin

Sipas tyre Biden nuk ka bërë thirrje për ndryshimin e regjimit në Rusi

“Për hir të Zotit, ky njeri nuk mund të qëndrojë në pushtet”, tha presidenti amerikan, Joe Biden, për homologun e tij rus, Vladimir Putin, gjatë një fjalimi në kryeqytetin e Polonisë, Varshavë, të shtunën.

Kjo deklaratë u korrigjua shpejt nga Shtëpia e Bardhë, duke thënë se Biden nuk po bënte thirrje për ndryshimin e regjimit, por po i kujtonte Putinit se nuk i lejohej të ushtronte pushtet mbi fqinjët e tij, raporton BBC.

Duke qenë se ai është kreu i një vendi që po lufton ushtarakisht dhe ka nën kontroll një arsenal bërthamor, shqetësimi nga ana e amerikanëve është se nuk duan ta vënë Putinin me shpatulla pas murit.

Kjo pasi, thirrja për ndryshimin e regjimit drejtpërdrejt mund të shkaktojë paqëndrueshmëri dhe të rrisë paparashikueshmërinë.

---