Shkarkohet Konsulli i Kosovës në Nju-Jork

Ai ka paralajmëruar padi për ministrinë

Ministria e Punëve të Jashtme e Kosovës ka shkarkuar nga detyra Konsullin e Përgjithshëm të Kosovës në Nju-Jork.

Lajmin e ka publikuar Konsulli i shkarkuar, Frymëzim Isufaj, i cili e ka cilësuar vendimin arbitrar, joligjor dhe politik, përcjell Albinfo.ch.

“Përveç ndërprerjes së parakohshme dhe të paarsyetuar të mandatit tim të rregullt, përmes vendimeve të paligjshme, dëshirojnë që të pamundësojnë edhe vazhdimin e marrëdhënies së punës si diplomat karriere në institucionin në të cilin kam shërbyer afërsisht në 10 vjetët e fundit”, ka shkruar Isufaj në Facebook.

Ai ka paralajmëruar padi për ministrinë.

“Për hir të mbrojtjes së kredibilitit të institucionit, si diplomat karriere, i cili i ka shërbyer një kohë të gjatë për institucionet e shtetit tonë, e të cilat janë ngritur me shumë mund e sakrificë, unë do ta respektoj këtë vendim pa komentuar motivin e nxjerrjes së tij. Megjithatë, betejën ligjore për të dëshmuar paligjshmërinë e këtij vendimi do ta vazhdoj tek institucionet përgjegjëse të Republikës së Kosovës, të cilat besoj se do të jenë të pavarura në trajtimin e lëndës duke vendosur drejtësi në këtë çështje”, njoftoi ai.

---