Lufta në Ukrainë çrregullon ekonominë në Kosovë

Agresioni rus në Ukrainë ka çrregulluar ekonominë globale e rrjedhimisht edhe ate në Kosovë.

Sipas Guvernatorit të Bankës Qendrore të Kosovës, Fehmi Mehmeti, aktualisht është vështirë të ndërmerret ndonjë masë për parandalimin e rritjes së inflacionit në Kosovë, pasi një gjë e tillë do të kishte efekte negative në rritjen e ekonomisë së vendit, transmeton Albinfo.ch.

Gjatë raportimit para Komisionit parlamentar për buxhet, Mehmeti tha se pas disa takimeve të mbajtura me Bankën Qendrore Evropiane, nuk është marrë ndonjë masë që do të parandalonte rritjen e inflacionit.

“Prandaj, edhe ne, si Bankë Qendrore, por po mendoj edhe Qeveria në këtë kontekst. Nëse shkojmë dhe marrim masa me qëllim që ta ndalim inflacionin – edhe pse është shumë e vështirë, sepse është inflacion i importuar – atëherë do ta ndikojmë ose do të kemi efekt negativ në rritjen ekonomike”, tha Mehmeti.

Ai shtoi se inflacioni është i importuar, për shkak se Kosova varet nga importimi i produkteve nga vendet evropiane.

Ndërkohë që sipas të dhënave të Agjencisë së Statistikave të Kosovës, importi i mallrave në janar të këtij viti ka kapur vlerën e 338.1 milionë eurove, ndërsa eksporti ka qenë në vlerë prej 64.2 milionë eurosh.

---