Edhe Mali i Zi miraton sanksione ndaj Rusisë

Keystone EPA/BORIS PEJOVIC

Qeveria e Malit të Zi ka miratuar të premten sanksione kundër Rusisë për shkak të sulmit ndaj Ukrainës.

“Sapo është miratuar një paketë masash kufizuese kundër Rusisë! Faleminderit të gjithë ministrave për bashkëpunimin!”, ka thënë zëvendëskryeministri i Malit të Zi, Dritan Abazoviç, përmes një postimi në Twitter.

Mes vendimeve të miratuara përfshihet ngrirja e pronave dhe burimeve ekonomike të disa shtetasve dhe kompanive ruse në Mal të Zi dhe ndalmi i punës së mediave qeveritare ruse.

Pas këtij vendimi reagoi ambasadorja amerikane në Mal të Zi, Judy Rising Reinke, e cila përgëzoi Qeverinë e Malit të Zi për këtë hap të ndërmarrë.

“Bravo! E rëndësishme të shohësh që vendi aleat, Mali i Zi, u është bashkuar sanksioneve të Bashkimit Evropian, të cilat janë të krijuara për të zvogëluar aftësitë e Rusisë që të financojë luftën e saj jonjerëzore dhe të paprovokuar ndaj popullsisë së Ukrainës”, shkroi në Twitter ambasadorja.