Qeveria Kurti shfuqizon vendimet e Qeverisë Haradinaj për tokat e AKP-së që iu ishin dhënë komunave

Qeveria e Kosovës ka shfuqizuar vendimet e ish-kryeministrit Ramush Haradinaj për dhënien e tokave të Agjencisë Kosovare të Privatizimit disa komunave.

Vendimi është marrë në mbledhjen e Qeverisë të mbajtur këtë të shtunë.

Kryeministri Albin Kurti tha se pronat duhet t’i kthehen AKP-së dhe se “kthimi i ligjshmërisë aty ku kërkohet është i pakompromis”.

Ndërsa, ministri i Administrimit të Pushtetit Lokal, Elbert Krasniqi, tha se ky vendim tani iu mundëson komunave që të mos kenë problem me ligjshmërinë e këtyre vendimeve.

“Ishte një vendim që ka të bëjë me ligjshmërinë e komunave, do të thotë është anuluar një vendim i ish-qeverisë gjatë vitit 2018, për shkak se është e pamundur të implementohet. Kjo pasi që gjatë vitit 2019 është shfuqizuar ligji për dhënien e pronës komunale, në shfrytëzim dhe këmbim. Tash e ka pamundësuar implementimin e vendimeve në mbledhjen e 55-të të qeverisë në vitin 2018 dhe kjo tash u mundëson komunave që të mos kenë probleme me ligjshmërinë e këtyre vendimeve”, është shprehur Krasniqi.