Zvicër: Nis një iniciativë për ndalimin e fishekzjarrëve

Grupi argumenton se fishekzjarrët trembin fëmijët e vegjël, si dhe kafshët shtëpiake dhe ato të fermës.

 

Të martën nisi mbledhja e nënshkrimeve për nismën popullore që kërkon të kufizojë përdorimin e fishekzjarrëve. Komiteti pas këtij propozimi përfshin organizata të tilla, si Lidhja Zvicerane Kundër Zhurmës, Shoqëria Kinologjike Zvicerane (“Qeni zviceran”), Pro Natura dhe të tjera, njofton albinfo.ch.

Grupi argumenton se fishekzjarrët trembin fëmijët e vegjël, si dhe kafshët shtëpiake dhe ato të fermës. Ato shkaktojnë gjithashtu shqetësime mjedisore dhe shëndetësore: çdo vit, 300 tonë grimca të imëta lëshohen në ajër, duke shkaktuar probleme të frymëmarrjes dhe rrezik zjarri.

Por, në vend që t’i nxjerrë jashtë ligjit plotësisht fishekzjarrët, komiteti tha se ato duhet të kufizohen vetëm në disa ngjarje – të tilla si nata e Vitit të Ri dhe 1 gushti – por nuk lejohen për ditëlindje dhe raste të tjera private.

Për ta çuar këtë çështje në kutinë e votimit, komisioni duhet të mbledhë 100,000 nënshkrime të vlefshme në 18 muaj. /Albinfo.ch

---