Zbulohet laborator i madh droge në veri të Kosovës

Në veriun e Kosovës sot zbarkuan Policia dhe Doganat e Kosovës duke bërë kontrolle nën dyshimet për kontrabandë. Por aty u zbulua një laborator i madh droge.

Derisa po zhvillohej ky aksion, aty u dëgjuan edhe armë, transmeton Albinfo.ch.

Përmes një njoftimi në Facebook, ministri i Punëve të Brendshme, Xhelal Sveçla, ka bërë të ditur se Policia e Kosovës në Izvor të veriut ka zbuluar laborator të kultivimit të marihuanës me mbi 10 mijë fije të bimës.

“Përgjatë këtij aksioni zyrtarët e policisë dhe doganave janë gjuajtur me armë zjarri, por aksioni po vazhdon me sukses pa asnjë lëndim apo dëm material”, ka bërë të ditur Sveçla. Postimi i plotë:

“Pandalshëm do ta luftojmë krimin në Republikën tonë. Në afërsi të kufirit me Serbinë, në vendin Izvor, në veri të Kosovës, policia zbuloi laboratorin e kultivimit të marihuanës me mbi 10.000 fije bimë të gatshme për t’u shitur ilegalisht në treg. Përgjatë këtij aksioni zyrtarët e policisë dhe doganave janë gjuajtur me armë zjarri, por aksioni po vazhdon me sukses pa asnjë lëndim apo dëm material. Ky është rezultat i vendosmërisë së madhe, duke bërë kështu që çdo ditë e më shumë vendi ynë të çlirohet nga krimi. Ju lumtë Policia dhe Dogana e Kosovës”, ka shkruar ai.

---