Zvicra, një mbështetëse e madhe e projekteve të qeverisjes komunale në Kosovë

Zvicra mbetet një mbështetëse thelbësore e qeverisjes lokale në Kosovë me synimin për të ofruar shërbime më të mira për qytetarët e saj.

Kështu njofton Ambasada zvicerane në Kosovë, shkruan Albinfo.ch.

“Ne i urojmë komunat fituese për çmimet e Grantit të Performancës Komunale”, shkruan ambasada.

E performanca e mirë e komunave do t’u sjellë qytetarëve edhe më shumë investime kapitale.

14 është numri i komunave që përfituan nga Granti i Performancës Komunale, kurse Komuna e Rahovecit, Komuna e Lipjanit dhe Komuna e Drenasit (Gllogocit) janë komunat me performancën më të lartë për vitin 2020.

Rreth 8 milionë euro u ndanë për komunat përfituese nga Ministria e Administrimit të Pushtetit Lokal, së bashku me qeveritë mbështetëse të vendeve të BE-së, përfshirë këtu Zvicrën.

Në ceremoninë e ndarjes u ritheksua rëndësia e stimulimit të komunave për të përmisuar cilësinë e qeverisjes së tyre, në atë mënyrë që të kemi një qeverisje lokale sa më të afërt me nevojat e qytetarëve, përcjell Albinfo.ch.

Tash radha është që komunat t’i jetësojnë projektet e tyre kapitale për të përmirësuar jetën e qytetarëve, thuhet në njoftim.

---