U mbajt Kuvendi zgjedhor i LAPSH “Naim Frashëri” në Zvicër

Foto Liburn Mehmetaj

Më 22 maj 2022, në Burgdorf, Bernë, Lidhja e Arsimtarëve dhe Prindërve Shqiptarë (LAPSH) “Naim Frashëri” në Zvicër mbajti Kuvendin zgjedhor.

Në ketë takim kanë qenë të pranishëm përpos stafit arsimor pranë LAPSH-it, përfaqësues të Këshillave Kantonale dhe prindër e veprimtarë shoqërorë.

Punimet e Kuvendit i hapi Nexhat Maloku, kryetar i LAPSH-it, i cili pasi përshëndeti të pranishmit, prezantoi edhe rendin e ditës që u miratua nga të pranishmit.

Sipas rendit të ditës, kryesuesi i mbledhjes, Nexhat Maloku, prezantoi  raportin e punës për periudhën maj 2018 deri në maj 2022. Ndërsa raportin financiar e paraqiti sekretari Gafurr Asani, të dy raportet u votuan nga të pranishmit.

Më pas Kuvendi me votim unanim zgjodhi kryetarin e ri të LAPSH-it Liburn Mehmetajn, avokat, aktualisht kryetar i Këshillit Kantonal – LAPSH në Gjenevë.

Kuvendin e përshëndeti kryetari i sapozgjedhur, avokati Liburn Mehmetaj, i cili falënderoi anëtarët e Kuvendit për besimin e dhënë dhe u zotua se do të bashkojë degëzimet organizative të mësimit plotësues të gjuhës shqipe si dhe do të përpiqet për ngritjen e mësimdhënies në një nivel sa më të lartë, me synim që të rritet numri i fëmijëve për të mësuar gjuhën amtare shqipe.

Të pranishmit në shenjë falënderimi mbyllen punimet me ngrohtësi e me duartrokitje.

Gjenevë, 24.05 2022

Nexhmije Mehmetaj