Valë e të nxehtit në Zvicër, kjo javë deri në 38°C

Vala e nxehtë është konfirmuar në pjesën më të madhe të Zvicrës nisur që nga sot.

Referuar MeteoNews, Zvicra do të ketë temperatura të larta deri në 30°C të mërkurën, e në disa zona fushore temperaturat do të arrijnë mbi 35 gradë të shtunën, njofton albinfo.ch.

Në fakt, piku i kësaj vale të nxehtit pritet mes të premtes dhe të dielës, termometrat tregojnë mes 33-35 gradë në rrafshnaltë dhe më shumë ditën e shtunë.

MeteoNews nuk përjashton 36-38 gradë pasditen e së shtunës në qendër të Valais dhe në luginën e Rhine.

Temperaturat sot (e hënë) po vazhdojnë të jenë të përballueshme me temperatura maksimale 25-28 gradë. Nesër pritet që koha të jetë sikurse sot, me po të njëjtat temperatura.

Më pas vapa do të rritet të mërkurën dhe të enjten, duke arritur në 30-35 gradë në ultësira dhe më shumë. /Albinfo.ch

 

---