Varhelyi kërkon në Parlamentin Europian liberalizimin e vizave për Kosovën

Komisioneri I BE për zgjerim Oliver Varhelyi shprehet se duhet një udhërrëfyes shtesë për liberalizimin e vizave në Kosovë.

Gjatë fjalës në Parlamentin Europian diplomati theksoi se Kosova është në pritje të liberalizimit të vizave dhe se duhet ecur përpara me këtë çështje.

Ai shtoi  se janë disa fusha, si lufta kundër krimit të organizuar, anti-trafikimi dhe kërkesat për azil, ku shtetet anëtare duan rezultate të qarta.

Kosova është vendi i vetëm në Ballkanin Perëndimor ku qytetarët nuk gëzojnë liberalizim vizash me  vendet e BE-së.

Qeveria e Kosovës thotë se ka plotësuar çdo kriter që i ka vendosur Unioni. Megjithatë, procesi është penguar vazhdimisht nga disa shtete anëtare të BE-së, sidomos Franca, e cila shpreh rezerva për lëvizjen e lirë të  shtetasve të Kosovës./Euronews