Haxhiu: Nuk janë 60 mijë veteranë, por rreth 20 mijë, listat duhet të pastrohen

photo facebook @albilena haxhiu

Lidhur me numrin e veteranëve, ministrja e Drejtësisë, Albulena Haxhiu, ka thënë se lista e veteranëve të UÇK-së duhet të pastrohet dhe ky proces duhet të fillojë sa më parë, në mënyrë që veteranët e vërtetë të mos pësojnë si pasojë e atyre që përfitojnë nga ky status, përcjell albinfo.ch.

“Përgjegjësinë për këtë proces e kemi bashkërisht si institucione. Ministria e Drejtësisë do të ndihmojë në çfarëdo instance që bëhet dhe të delegojë një përfaqësues. Listat e veteranëve duhet të pastrohen. Ne pajtohemi se nuk i kemi pasur 60 mijë veteranë. Do të donim t’i kishim, por s’i kemi pasur. I kemi pasur rreth 20 mijë. Nuk e di që dikush mund sot të deklarojë se kanë qenë 60 mijë veteranë luftëtarë”, ka theksuar Haxhiu.

Ajo ka thënë se verifikimi është shumë i lehtë dhe mund të bëhet nëpërmjet komandantëve të zonave, por në këtë proces kontributin e tyre duhet ta japin edhe vetë veteranët e vërtetë.

“Për shkak të këtij numri të fryrë e të madh, që është bërë komplet për vota në të kaluarën, ne nuk po mund t’ua plotësojnmë nevojat reale që i kanë veteranët luftëtar. Është koha e fundit kur duhet t’i trajtojmë seriozisht dhe siç duhet ata që kanë dhënë gjithçka që Kosova sot mtë jetë e lirë”.