Sulmohet policia e Kosovës në veri të Mitrovicës

5 zyrtarë policorë të Kosovës janë lënduar pas një sulmi që ndodhi mbrëmë në veri të Mitrovicës, teksa i bënë thirrje një kamioni të ndalonte në fshatin Jashanicë të Leposaviqit, pasi dyshohej se transportonte mallra kontrabandë.

Menjëherë në drejtim të kamionit kanë shkuar disa automjete të civilëve të zonës që tentuan të pengonin policinë të kryente detyrën e saj.

Më pas drejtuesi i kamionit shtoi shpejtësinë dhe çau postbllokun e sajuar me makina policie, duke lënduar 5 efektivë.

“Duke parë rrezikun e lartë për jetën e zyrtarëve policorë si dhe pjesëmarrësit e tjerë në trafik, zyrtarët policorë kanë ndërmarrë veprimet e domosdoshme dhe proporcionale me qëllim të ndalimit të rrezikut, duke përdorur armën zyrtare. Pas të gjitha veprimeve ligjore zyrtarët policorë në fshatin Llazhinë kanë arritur të ndalin kamionin dhe me këtë rast kanë arrestuar drejtuesin, personin e dyshuar A.D.”, thuhet në njoftimin e policisë.