Treni përplaset me një makinë, dy të lënduar rëndë

Në aksident, dy pasagjerët, një  39-vjeçar dhe tjetri 21-vjeçar kanë pësuar lëndime të rënda, ndërsa shoferi 55-vjeçar i veturës është lënduar në masë të lehtë

Një tren nga Appenzeller Bahnen u përplas dhunshëm me një makinë në një mbikalim në Wasserauen (AI) dhe më pas doli nga shinat.
Të tre personat që udhëtonin në makinën e pasagjerëve u lënduan dhe u desh të dërgoheshin në spital me shërbimin Rega, transmeton albinfo.ch.

Në aksident, dy pasagjerët, një  39-vjeçar dhe tjetri 21-vjeçar kanë pësuar lëndime të rënda, ndërsa shoferi 55-vjeçar i veturës është lënduar në masë të lehtë, sipas policisë kantonale të Appenzell Innerrhoden, shkruan srf.ch. Drejtuesi i trenit dhe pasagjerët e paktë në tren nuk kanë pësuar lëndime.

Sipas policisë, treni i kompanisë Appenzeller Bahnen ishte duke u nisur nga Wasserauen në drejtim të Appenzellit pak para orës 11:30. Në të njëjtën kohë, 55-vjeçari donte të kalonte makinën e tij përmes një mbikalimi të siguruar. Për pasojë, ndodhi përplasja. Shkatërrimi i makinës ishte total, ndërsa dëmet që ka pësuar treni mund të të arrijnë në disa qindra mijëra franga.

Një vinç special u desh të vendosej për të shpëtuar përbërjen e trenit, përcjell albinfo.ch. Shërbimi i trenave në këtë pikë do të qëndrojë i pezulluar deri në fund të ditës. Gjatë kësaj kohe do të qarkullojnë autobusët zëvendësues. Për ngjarjen është informuar Bordi Zviceran për Hetimin e Aksidenteve (Sust).

---