Ditët e Diasporës në Vushtrri

Fillon më 21 dhe do të përfundojë më datë 24 korrik

Komuna e Vushtrrisë edhe këtë verë ka organizuar aktivitete të ndryshme kulturore e argëtuese për bashkatdhetarët që kanë ardhur në pushime.

Për katër ditë radhas, bashkatdhetarët do të kenë mundësinë të argëtohen në këtë qytet.

“Si zakonisht, edhe këtë vit kemi organizuar manifestimin tradicional “Ditët e Diasporës”, që do të fillojmë më 21 dhe do të përfundojë më 24 korrik”, ka thënë kryetari Ferit Idrizi.

Në ditën e parë do të hapet ekspozita “Into the Ocean” nga autorja Fjolla Ferati, në ora 19:00 në Shtëpinë e Kulturës, për të vazhduar me koncertin me moton “Ti je pjesë e Atdheut”.

Pjesë e koncertit që nis nga ora 20:30 në sheshin “Adem Jashari”, do të jetë dhe këngëtari i mirënjohur Ramadan Krasniqi -Dani.

Në ditën e dytë do të organizohet promovimi i librit “Unë, biri i Oshlanit Heroik”, i autorit Islam Islami (nga ora 19:00 në Shtëpinë e Kulturës “Hasan Prishtina”). Ndërsa nga ora 20:30, në Kalanë e Qytetit mbahet Ballo me Maska (me motive nga vitet 1920).

Në ditën e tretë – 23 korrik do të organizohet tryezë me mërgimtarë, me qëllim promovimin e turizmit malor, urban dhe agroturizmit (në Qendrën e Kulturës, në ora 12:00). Ndërsa nga ora 20:30, në sheshin “Norwalk” (afër Qendrës së Kulturës”, të rinjtë do të kenë rastin të luajnë street-ball.

Ndërsa në natën e katërt, më 24 korrik, do të shtrohet sofra për mërgimtarë, me muzikë burimore shqipe. Ky aktivitet mbahet në Kalanë e Qytetit nga ora 20:30.

 

 

---