Presidenti Biden rezulton negativ me COVID-19, por e vazhdon izolimin

Mjeku i Shtëpisë së Bardhë, dr. Kevin O’Connor, ka thënë se presidenti vazhdon të ndihet shumë mirë.

Presidenti i Shteteve të Bashkuara të Amerikës, Joe Biden, ka dalë sot negativ me COVID-19, por ai do të vazhdojë të qëndrojë në izolim derisa të dalë negativ për herë të dytë.

Kjo u bë e ditur përmes një letre nga mjeku i Shtëpisë së Bardhë, dr. Kevin O’Connor, i cili ka shkruar se presidenti vazhdon të ndihet shumë mirë, raporton Albinfo.ch.

Për herë të parë pozitiv me COVID-19 presidenti Biden rezultoi më 21 korrik dhe siç njoftoi administrata e tij, ai përjetoi vetëm simptoma të lehta, duke përfshirë lodhje, rrjedhje hunde dhe kollë.

Pasi rezultoi negativ më 27 korrik, Biden u largua shkurtimisht nga izolimi, por u rikthye në izolim pasi u testua sërish pozitiv më 30 korrik, në atë që O’Connor e përshkroi si një rast “rikthimi”.

Presidenti Biden ka vazhduar të punojë gjatë sëmundjes së tij, duke përfshirë disa paraqitje publike, të distancuara në Shtëpinë e Bardhë dhe ngjarje virtuale./Albinfo.ch

---