Reuters shkruan për spiunët rusë në Kosovë

Rusia është aleati kryesor i Serbisë dhe ashtu si Beogradi është kundër pavarësisë së Kosovës, thuhet në artikull

Ministri i Brendshëm i Kosovës tha të shtunën se është arrestuar një gazetare ruse në kufi me dyshimin se ajo mund të ishte spiune dhe autoritetet e sigurisë po kërkonin “qëllimet e saj”. Kështu nis artikulli i Reutersit për Kosovën.

Ministri i Brendshëm i vendit, Xhelal Sveçla, tha se bëhej fjalë për gazetaren Daria Aslamova.

“Shumë vende kanë vërtetuar se ajo ishte e angazhuar në spiunazh për inteligjencën ushtarake ruse dhe se ajo pretendonte të ishte gazetare”, tha Svecla në deklaratën për shtyp.

Reuters nuk mundi të verifikonte akuzat e ministrit Sveçla. Gazetarja nuk ishte e disponueshme për koment dhe ishte e paqartë nëse ajo kishte punësuar një avokat.

Sveçla ka publikuar në faqen e tij në Facebook disa foto të gazetares me ministrin e Jashtëm rus, Sergej Lavrov, dhe një tjetër me presidentin sirian, Bashar al-Assad.

Rusia është aleati kryesor i Serbisë dhe ashtu si Beogradi, është kundër pavarësisë së Kosovës.

Tensionet mes fqinjëve të Ballkanit Perëndimor, Kosovën dhe Serbinë janë ndezur kohët e fundit dhe kanë arritur “kulmin”  javën e kaluar pas marrëveshjes për targat.

Tashmë detyrimi është shtyrë.

Serbët etnikë përbëjnë rreth 5 për qind të popullsisë së Kosovës, që është 90 për qind shqiptarë etnikë.

 

---