Bie çmimi i grurit në tregun botëror

Në rënien e çmimit pati ndikim të drejtpërdrejtë marrëveshja e ndërmjetësuar nga OKB--ja dhe Turqia që çliroi eksportin e drithit ukrainas të bllokuar prej muajsh nga ushtria ruse.

Organizata për Bujqësinë dhe Ushqimin (FAO) njoftoi se gjatë muajit korrik pati një rënie me 8.6 për qind të Indeksit mujor të Çmimeve të Ushqimeve.

Bëhet fjalë për reduktimin më të madh mujor që prej vitit 2008. Ky indeks arriti kuotën e 140.9 pikëve në korrik dhe kjo përbën rënien e katërt mujore radhazi, raporton Albinfo.ch.

Në reduktimin drastik të çmimit të ushqimeve pati ndikim të drejtpërdrejtë marrëveshja e ndërmjetësuar nga OKB-ja dhe Turqia që çliroi eksportin e drithit ukrainas të bllokuar prej muajsh nga ushtria ruse.

Të dielën katër anije të tjera që transportonin drithëra dhe ushqime u nisën nga portet ukrainase.

Sipas FAO-s, marrëveshja që garantohet nga pala turke për eksportet e grurit po jep sinjale pozitive sidomos për ato vende që po vuajnë nga kriza e urisë.

Megjithatë, ekspertët thonë se tregu botëror i ushqimeve vijon të mbetet i mbërthyer nga pasiguritë, për shkak të presionit të çmimit të plehrave kimikë, prodhuesi më i madh i të cilëve është Rusia.

Ky indeks bazohet në çmimet botërore për 23 kategori të mallrave ushqimore që mbulojnë 73 produkte të ndryshme./Albinfo.ch

---