Krasniqi falënderon presidentin Begaj për mbështetjen për ish-krerët e PDK-së që ndodhen në Hagë

Kryetari i Partisë Demokratike të Kosovës, Memli Krasniqi, është takuar me presidentin e Shqipërisë, Bajram Begaj në ndërtesën e Kuvendit të Kosovës.

Kryetari i Partisë Demokratike të Kosovës, Memli Krasniqi, është takuar me presidentin e Shqipërisë, Bajram Begaj, në ndërtesën e Kuvendit të Kosovës.

Presidenti Begaj e ka vlerësuar lart angazhimin shtetformues e shtetndërtues të PDK-së, të liderëve të saj si dhe gatishmërinë e tij dhe të Republikës së Shqipërisë për proceset jetike të Kosovës me qëllim të fuqizimit të shtetësisë, demokracisë dhe proceseve integruese euroatlantike, raporton Albinfo.ch.

Krasniqi e ka përgëzuar Begajn për hapjen e negociatave për anëtarësimin e Shqipërisë në Bashkimin Evropian, duke shprehur besimin se ky vendim i BE-së e ka kthyer vëmendjen kah Ballkani Perëndimor.

Krasniqi po ashtu e ka falënderuar Begajn për mbështetjen që po u jep dy ish-liderëve të PDK-së, të cilët ndodhën në paraburgim në Gjykatën Speciale në Hagë.

Në komunikatën e PDK-së për media thuhet se Krasniqi ka falënderuar presidentin Begaj për mbështetjen që Shqipëria po jep për dy liderët historikë, Hashim Thaçi dhe Kadri Veseli dhe bashkëluftëtarët e tyre, që nga shkuarja e tyre në Hagë.

Krasniqi po ashtu është shprehur mirënjohës ndaj shtetit shqiptar edhe për adresimin në Asamblenë Parlamentare të Këshillit të Evropës, me kërkesë për të rishikuar rezolutën e KE-së për raportin e ish-senatorit Dick Marty./Albinfo.ch

---