KFOR-i amerikan vendoset në Jarinje

Një ditë para takimit në Bruksel të kryeministrit të Kosovës Albin Kurti me presidentin serb, Aleksandër Vuçiq, forcat ushtarake të KFOR-it amerikan janë vendosur në Jarinje, afër pikës kufitare me Serbinë, raporton teve1.info

Në fotografitë e realizuara të mërkurën në mesditë nga Tëvë1 nuk vërehet qarkullim i shtuar i qytetarëve ose veturave.

Mirëpo një ditë më parë KFOR-i ka njoftuar se ka rritur prezencën në pikëkalimet kufitare në Jarinje dhe Bërnjak si dhe ka shtuar aktivitetet patrulluese në veri të vendit.

Këto masa sipas trupave paqeruajtëse të KFOR-it janë marrë për të mundësuar që të reagojë shpejt ndaj të gjitha sfidave të sigurisë.

“Ne duam të sigurojmë të gjithë se KFOR-i është i gatshëm të intervenojë nëse është nevoja”, është thënë nga Zyra për Media e KFOR-it.

---