Kosova kërkon nga BE-ja të përfshihet në masat e saj për energjinë

Ministrja e Ekonomisë së Kosovës, Artane Rizvanolli, ka kërkuar nga Bashkimi Evropian që Kosova dhe shtetet e Ballkanit Perëndimor të përfshihen në masat e ndërmarra dhe ato që do të ndërmerren nga ana e BE-së, në mënyrë që të përfitojnë nga to.

Presidenca e Republikës së Çekisë ka organizuar takim informal të ministrave të Energjisë së Evropës, ku u diskutua për masat për përmballje me krizën energjetike evropiane, përfshirë këtu reduktimin e kërkesës për energji elektrike, kufirin e të hyrave për prodhuesit e energjisë elektrike, si dhe sigurimin e një kontributi solidar nga bizneset e lëndëve djegëse fosile.

Gjatë takimit, ministrja e Ekonomisë së Kosovës, Artane Rizvanolli, ka kërkuar nga Bashkimi Evropian që Kosova dhe shtetet e Ballkanit Perëndimor të përfshihen në masat e ndërmarra dhe ato që do të ndërmerren nga ana e BE-së, në mënyrë që të përfitojnë nga ato, raporton Albinfo.ch.

Rizvanolli ka kërkuar gjithashtu hartimin e mekanizmave që garantojnë shpërndarje të të ardhurave nga kufiri i të hyrave për prodhuesit e energjisë elektrike edhe tek shtetet të cilat nuk janë pjesë e BE-së, por që varen nga importi i energjisë elektrike, siç është Kosova.

Veç tjerash, ministrja Rizvanolli ka kërkuar hartimin e një pakoje financiare nga ana e BE-së për zgjerim e rritje të ndikimit të masave që Republika e Kosovës është duke ndërmarrë për t’u përballur me krizën energjetike, përmes rritjes së efiçiencës, uljes së konsumit, si dhe mbrojtjes së konsumatorëve të cenueshëm./Albinfo.ch

---