CIA parajmëron Rusinë për pasojat në rast të përdorimit të armëve bërthamore

Shefi i Agjencisë Qendrore të Inteligjencës (CIA) në Shtetet e Bashkuara, William Burns, takoi më 14 nëntor në Turqi homologun e tij të inteligjencës ruse, Sergey Naryshkin.

Sipas një zyrtari të Këshillit për Siguri Kombëtare të Shtëpisë së Bardhë, në këtë takim u nënvizuan pasojat nëse Rusia vendos të përdorë armë bërthamore në Ukrainë.

Ky zyrtar, i cili foli në kushte anonimiteti, tha se Burns dhe Naryshkin nuk diskutuan për zgjidhjen ose marrëveshjen e luftës në Ukrainë.

Në këtë takim, sipas tij, Burns diskutoi gjithashtu edhe për çështjet e Brittney Griner dhe Paul Whelan.

SHBA-ja ka thënë gjatë verës se i ka bërë “ofertë” serioze Rusisë për lirimin e yllit të basketbollit, Griner, e cila u dënua në gusht të këtij viti me nëntë vjet burgim, pasi policia tha se i kishin gjetur vaj kanabisi në bagazhin e saj. Ndërsa Whelan është dënuar në vitin 2020 me 16 vjet burgim në Rusi, nën akuzat për spiunim./rel