Veriu mbetet i barrikaduar edhe sot

@policia e kosoves page fb

Edhe të hënën po vazhdojnë të qëndrojnë barrikadat në veri të Mitrovicës, të vendosura nga serbët lokalë pas arrestimit të ish-policit Dejan Pantiq, përcjell albinfo.ch.

Ditët e fundit janë përcjellë me incidente në këtë pjesë, derisa në disa raste ka pasur edhe shpërthime me shok-bomba.

Përkundër thirrjes së ambasadave amerikane dhe britanike në Kosovë e Serbi për heqje të barrikadave, një gjë e tillë nuk ka ndodhur.

Kryeministri i Kosovës, Albin Kurti dhe ministri i Punëve të Brendshme, Xhelal Sveçla, në një konferencë për media të dielën pas mbledhjes së Këshillit të Sigurisë, kanë deklaruar se po presin nga KFOR-i heqjen e barrikadave. Kurti ka thënë se Serbia po synon rikthimin e luftës në Kosovë.

Në anën tjetër, edhe Serbia  ka mbajtur një mbledhje të Këshillit të Sigurisë, derisa presidenti serb, Aleksandar Vuçiq, ka thënë se presin lirimin e ish-policit Pantiq, duke shtuar se serbët në Kosovë po i pret një periudhë e vështirë.