Çmimet e larta për ngrohje, shqyrtohet mundësia për shtyrjen e afatit të pagesës

@pixabay

Rritja e kostove shtesë, sidomos atyre të ngrohjes, po shkaktojnë problem për qytetarët e Zvicrës, sidomos atyre që jetojnë me qira. Madje, pritet që faturimi i radhës të jetë edhe më i lartë, çka ka bërë që Parlamenti të shqyrtojë mundësinë për shtyrjen e afatit të pagesës.

Arsyeja e rritjes së kostos së ngrohjes është për shkak të çmimeve të energjisë, të cilat u rritën pas luftës në Ukrainë, raporton 20minuten, përcjell albinfo.ch.

Shoqata e Qiramarrësve të Cyrihut supozon se shumë qiramarrës do të kenë probleme për të mbuluar koston e shpenzimeve. “Qaramarrësit e apartamenteve që ngrohen me gaz janë veçanërisht të prekur. Shpenzimet shtesë për familjet që jetojnë me qira mund të kalojnë 1000 franga në vit”, shpjegohet në përgjigjen e shoqatës për 20minuten, përcjell albinfo.ch.

Faturimi do të bëhet në qershor dhe për këtë po kërkohet nga shoqata që të ketë një zgjidhje ligjore për afatin, nga 30 në 90 ditë, meqë qytetarët do të mund të shkyçen nga sistemi pa paralajmërim. Këshilli pritet të diskutojë të hënën këtë propozim.