Kosovë: Rrezikohet jeta e policëve në veri, policët përdorin armë

Policia e Kosovës ka bërë të ditur se policia është detyruar që ta përdorë armën pasi është rrezikuar jeta e zyrtarëve policorë nga ana e të dyshuarve.

Sipas njoftimit policia ndodhej në pikë kontrolli në fshatin Banje në një rrugë ilegale, dhe aty ka ardhur/qarkulluar një automjet xhip i tipit audi, të cilit i kanë sinjalizuar për ndalje.

“Zyrtarët policorë në pikë kontrolli sipas procedurave kanë sinjalizuar automjetin me bateri që të ndalojë për kontroll rutinor, por personi i dyshuar (drejtuesi i automjetit) posa ka vërejtur zyrtarët policorë, të cilët e kanë sinjalizuar për ndalim, ka rritur shpejtësinë për të ikur nga ndalimi duke rrezikuar drejtpërdrejt jetën e zyrtarëve policorë, përderisa njëri nga zyrtarët policorë me qëllim të shmangies së rrezikut të drejtpërdrejtë për jetën e tij dhe zyrtarëve të tjerë policorë është detyruar të përdorë armën e zjarrit”, thuhet në njoftim.