Albin Kurti dhe Aleksandar Vuçiq takohen në Ohër

Raportohet se kryeministrat e Kosovës dhe Serbisë, Albin Kurti dhe Aleksandar Vuçiq, me ndërmjetësimin e SHBA-së dhe BE-së, gjegjësisht përfaqësuesit e tyre, Gabriel Eskobar dhe Miroslav Lajçak, sot në Ohër do të diskutojnë për planin e zbatimit të propozimit evropian për normalizim të raporteve mes dy vendeve.

Dialogu në Ohër ka filluar në ora 10:00 me mbërritjet e pjesëmarrësve. Përfaqësuesi i Lartë, i mbështetur nga Përfaqësuesi Special i BE-së, Miroslav Lajçak, së pari do të mbajë takime të veçanta dypalëshe me liderët njëri pas tjetrit.

Kryeministri Albin Kurti, i shoqëruar nga sigurimi, është nisur nga hoteli ku ka fjetur mbrëmë, Inex Oglica, drejt shtëpizave shtetërore, ku edhe pritet të nisin takimet mes dy delegacioneve, Kosovë-Serbi.

Ai është pyetur nga gazetarët se a pret ndonjë rezultat pozitiv nga takimi.

Kryeministri i është përgjigjur pozitivisht për pushim, dhe ka thënë se pret rezultate pozitive nga takimi.

Propozimi evropian, i cili, është pranuar më 27 shkurt nga të dyja palët, shihet si një marrëveshje e përkohshme e cila do të çojë deri në zgjidhjen përfundimtare çështjes Kosovë Serbi. Megjithatë, kjo marrëveshje nuk parasheh njohje reciproke. Diplomatët janë deklaruar se momentalisht kjo është marrëveshja më e mirë e mundshme.

Dokumenti ka gjithsej 11 nene, duke përfshirë zotimin e palëve për t’i respektuar marrëveshjet e deritanishme mes dy vendeve si dhe të mos e pengojnë njëra tjetrën në integrime.

Serbia kërkon që të formohet Asociacioni i komunave me shumicë serbe në Kosovë, ndërkaq Kosova kërkon që marrëveshja përfundimtare ta përfshijë edhe njohjen reciproke.

Dialogu Kosovë-Serbi ka filluar që në vitin 2011.