Nëse ziheni duke folur në telefon gjatë vozitjes, dënoheni 380 euro

Pothuajse 180 000 holandezë u kapën duke vozitur dhe duke përdorur një telefon celular vitin e kaluar, tha sot policia holandeze.

”Shifra e fundit tregon një rritje prej 40 000 personash krahasuar me vitin 2021”, thanë zyrtarët.

”Kjo sjellje nuk po rrezikon vetëm veten, por edhe jetën e të tjerëve”, tha polici i trafikut, Paul Broer, transmeton dpa, përcjell albinfo.ch.

Ai tha se rritja e numrit të gjobave të lëshuara ishte kryesisht për shkak të kamerave të montuara në ura që janë përdorur për të regjistruar automatikisht drejtuesit që mbajnë celularët e tyre, të instaluara në mesin e vitit 2021.

Policia përdor gjithashtu aparatura të tjera në mënyrë që të mund të shohë në kabinat e kamionëve nga një pozicion më i lartë.

Kushdo që kapet duke mbajtur një telefon celular në një makinë ose në një motoçikletë, do të gjobitet me 380 euro (418 dollarë).

Ndërkohë, ata që dallohen duke mbajtur një celular në vesh ose duke bërë një mesazh teksa ngasin një biçikletë mund të presin të gjobiten me 150 euro.

Numri i përgjithshëm i përdoruesve të rrugës të kapur duke përdorur celularë vitin e kaluar përfshinte rreth 53 000 çiklistë.