Kosovë: Defender Europe’23, ngjarja më e madhe ushtarake në vend

Kosova për herë të dytë është nikoqire e stërvitjes së njohur ndërkombëtare “Defender Europe 2023”.

Në ceremoninë e cila u organizua në sheshin e Prishtinës, presidentja e Kosovës Vjosa Osmani-Sadriu theksoi se kjo është një ditë historike për Kosovën.

“Kjo stërvitje përkon edhe me 24 vjetorin e çlirimit të Kosovës. “Është ditë aq e freskët sa edhe ndërhyrja e NATO-s kundër regjimit të Millosheviqit. Ne ishim viktima e regjimi i Millosheviqit ishte agresori. Le të shërbejë kjo stërvitje ndërkombëtare si triumf i shpirtit njerëzor dhe vullnetit të paepur të ushtarëve si ju”, theksoi Osmani.

Ndërsa kryeministri Albin Kurti në fjalën e tij, tha se “Defender Europe 2023” është ngjarja më e madhe ushtarake që ka ndodhur ndonjëherë në Kosovë.

“Mbi 1 mijë e 300 ushtarakë do të ekzekutojnë detyra në krah të 24 mijë ushtarakëve të forcave të armatosura të 25 vendeve të NATO-s dhe atyre partnere të SHBA-së”, tha kryeministri Kurti.

Kurti bëri të ditur se në këtë ushtrim, FSK radhitet e katërta në mesin e 25 ushtrive pjesëmarrëse sa i përket numrit të personelit të angazhuar.