Kurti: Zgjedhje të parakohshme në veri, por policia s’mund të tërhiqet

Kryeministri i Kosovës, Albin Kurti, ka folur para mediave në Bruksel pas takimit që pati me shefin e Politikës së Jashtme e të Sigurisë së BE-së, Josep Borrell, si dhe me emisarin e BE-së për dialogun Kosovë-Serbi, Mirosllav Lajçak. Ai bëri të ditur se nuk pati takim trelateral sepse pala tjetër ka refuzuar një gjë të tillë.

“Në fillim të takimit unë kam prezantuar një dokumentacion Borrell-it e Lajçak-ut lidhur me rrëmbimin e tre policëve të Kosovës në Leposaviq, më 14 qershor, kur janë bërë më shumë se një javë e që po mbahen peng nga Serbia, në burgun e Kralevës”, tha kryeministri Kurti, duke kërkuar që ta dënojnë publikisht agresionin e Serbisë ndaj Kosovës.

Ndërsa sa i përket zgjidhjes më të qëndrueshme Kurti theksoi se ka nevojë për zgjedhje të parakohshme në katër komunat në veri me një proces qe i paraprihet nga sundimi i ligjit, nga një fushatë e hapur e fer dhe nga zgjedhjet e lira e demokratike.

Por kërkesës së BE-së për tërheqje të Policisë nga veriu Kurti iu përgjigj duke thënë se policia nuk është në komunë, por pranë dhe prania e tyre nuk është e dëshirueshme, as për palën kosovare, por është e obligueshme, duke pasur parasysh ekstremistët e dhunshëm që kanë qëlluar mbi ushtarët e KFOR-it, mbi policët, mbi gazetarët, derisa nuk ka përballje me drejtësinë të këtyre elementeve destabilizues.