Një ditë brenda Shërbimit Informativ të Zvicrës

Pixabay: Ilustrim

Për herë të parë, Shërbimi Informativ i Konfederatës së Zvicrës ka pranuar të hapë dyert për mediat.

Televizioni publik, RTS, ka kaluar ditën me njësinë kundër terrorizëm. Në qytetin e Bernës, të cilin banorët e saj e quajnë Pentagon është vendi sekret ku zakonisht, kamerat dhe mikrofonat nuk janë të mirëseardhura.

Në kushte anonimiteti të plotë disa prej punonjësve të shërbimit informativ tregojnë për punën e tyre.

“Diskrecion i një oficeri të zbulimit është çelësi. Është një mision që e kryej dhe jam e bindur për atë që po bëj. Është e rëndësishme për mua të jap kontributin tim për sigurinë e Zvicrës dhe popullatës së saj. Tingëllon pak klishe, por kaq”, thotë një prej tyre.

Për të kuptuar se si funksionojnë agjentët e inteligjencës zvicerane, RTS ishte në gjendje të merrte pjesë në një takim të seksionit kundër terrorizmit.

Refleksi i parë kur mbërrini në dhomë është të lini celularët në një kavanoz të pajisur me bllokues valësh, për të parandaluar regjistrimin ose përgjimin e bisedave, përcjell albinfo.ch.

Diskutimi fokusohet te një individ, i parë në një grup të hapur në aplikacionin Telegram, i cili bën propagandë për grupin e Shtetit Islamik dhe shpërndan përmbajtje xhihadiste.

Edhe pse sulmet janë bërë më të rralla, numri i rasteve të terrorizmit të trajtuara nga FIS nuk është ulur vitet e fundit dhe kërcënimi konsiderohet ende i lartë.

Frika kryesore e inteligjencës zvicerane është kërcënimi endogjen. “Ai është një individ që radikalizohet, shumë shpesh i vetëm pas ekranit të tij, dhe që mund të kryejë një sulm të dhunshëm me mjete të thjeshta, për shembull me thikë. Ne përjetuam dy në vitin 2020, në harkun e dy muajve”, u shpreh njëri prej punëtorëve të shërbimit.

Për të parandaluar aktin, një nga masat e para të SRC-së është kontaktimi i personit të zbuluar dhe thirrja për intervistë parandaluese.

“Për ne është e rëndësishme të kemi një pamje të plotë të personit, të arrijmë ta njohim, t’i bëjmë pyetje konkrete në lidhje me aktivitetet e tyre”, tregon agjenti tjetër.

Vitin e kaluar, FIS urdhëroi gjithsej 95 vëzhgime dhe afro 14,000 hetime. Shenjë e një situate politike globale gjithnjë e më komplekse, kjo shifër është dyfishuar krahasuar me një vit më parë.