Banorëve të Brienz-it u jepet leja të kthehen në shtëpi

Autoritetet thonë se banorët e një fshati të vogël zviceran, i cili mezi i shpëtoi fshirjes nga harta kur një pjesë e malit që ngrihej sipër tij u shemb, tani janë të sigurt për t'u kthyer në shtëpi

Fshati Brienz, pranë vendpushimit të skijimit të Davosit në kantonin lindor Graubunden, u boshatis nga 84 banorët e tij në maj, pasi autoritetet thanë se maja Insel ishte bërë e paqëndrueshme.

Një pjesë e tërë e malit u shemb gjatë natës së 15 – 16 qershorit, duke bërë që rreth 1.5 milionë metra kub shkëmb të rrëzohen në errësirë, duke u ndalur pikërisht në skaj të fshatit.

Një mur i lartë me baltë dhe shkëmb u ndal para shkollës.

“52 ditë pas evakuimit dhe 18 ditë pas rrëshqitjes së madhe të dheut, jeta e përditshme mund të rifillojë rrjedhën e saj në Brienz”, thanë autoritetet komunale në një deklaratë të hënën.

Fshati “tani është përsëri i sigurt”, thanë ata, shkruan The Local, përcjell albinfo.ch.

Megjithatë, një zonë në veri të Brienz është ende jashtë kufijve, dhe kushdo që endet në zonë, mund të gjobitet deri në 5,000 franga zvicerane.

Mali ende po monitorohet nga një sistem paralajmërimi i hershëm dhe nëse do të bëhej sërish i paqëndrueshëm, fshatarët dhe bagëtia e tyre mund të evakuoheshin edhe një herë.

Tarraca në të cilën ndodhet Brienz është gjithashtu në lëvizje, pasi është zhvendosur disa centimetra në vit gjatë shekullit të kaluar. Rrëshqitja është përshpejtuar ndjeshëm gjatë 20 vjetëve të fundit.

Për të ngadalësuar procesin, një tunel u hap nën fshat në vitin 2021. Ai duhet të thajë ujin dhe të ngadalësojë rrëshqitjen.

---