Letër mirënjohje 13 deputetëve zviceranë që kritikuan masat e BE-së ndaj Kosovës

Mësohet se deputetja e Kuvendit të Kosovës nga radhët e Grupit Parlamentar të Lëvizjes Vetëvendosje, Jeta Statovci, u ka dërguar një letër mirënjohje deputetëve zviceranë që shprehen shqetësimin e tyre për sanksionet e Bashkimit Evropian ndaj Kosovës, përcjell albinfo.ch.

Statovci përmes një letre ka shprehur vlerësimin e saj karshi 13 deputetëve që në mënyrë unanime kritikojnë qasjen e Brukselit.

Ky është reagimi i saj:

U kam dërguar letër mirënjohje deputetëve zviceranë, të cilët shprehën shqetësim për masat e Bashkimit Evropian ndaj Kosovës, dhe kërkuan një qasje të drejtë dhe të balancuar nga EU.

13 deputetë në mënyrë unanime kritikojnë qasjen e Bashkimit Evropian ndaj ngjarjeve të fundit në veri të vendit.

Dëshiroj të shpreh thellësisht vlerësimin për këndvështrimin që keni artikuluar në letrën tuaj. Kuptimi i mprehtë i kompleksitetit të situatës në Kosovë tregon përkushtimin tuaj të palëkundur për promovimin e paqes, stabilitetit dhe përparimit brenda BE-së dhe më gjerë. Në këtë drejtim, ne përshëndesim pikëpamjet tuaja për refuzimin e Serbisë për të respektuar Marrëveshjen, si dhe për provokimet e qëllimshme të Presidentit Vuçiq që nxisin kaos tek komunitetet që jetojnë në veri të Kosovës. Kjo kryesisht përdoret për konsum personal dhe të brendshëm politik në Serbi. Qeveria jonë është e përkushtuar ndaj shtetit të së drejtës, parim themelor i cili siguron barazi dhe drejtësi ndaj të gjithë qytetarëve të Republikës.