SHKURORËZIMI NË PLEQËRI, VETËM PËR TË MARRË NJË PENSION MË TË LARTË!

Ilustrim, Pixabay

Shkruan: Lirim Begzati

Në moshën e pensionimit, pensioni më i lartë që mund të realizohet nga një person/bashkëshort është 2’450 franga. Kurse për të dy bashkëshortët është 3’555 franga. Kjo nënkupton pra 150% të pensionit më të lartë individual. Ndryshe thënë, 2’450 franga nuk iu takon çdonjërit bashkëshort, por 150% nga pensioni më i lartë i njërit prej tyre.

Në rast shkurorëzimi, kjo llogari nuk aplikohet. Nëse të dy bashkëshortët i plotësojnë kushtet për pension maksimal, atëherë që të dyve do t’u takojë shuma mujore prej 2’450 frangash.

Kjo është, pra, edhe arsyeja që disa çifte të moshuar preferojnë të shkurorëzohen në moshën e pensionimit apo pak para pensionimit, për të realizuar një pension individual maksimal, e jo një pension që aplikohet për çiftet bashkëshortore. Të dy mund të realizojnë kësisoj një pension mujor deri 4’900 frangash (në vend të 3’555 frangave).

Kjo mënyrë veprimi nuk është e ndaluar me ligj. Por, kuptohet se edhe keqpërdorimet përcillen dhe verifikohen nga institucionet shtetërore, qofshin këto sadopak më vështirë të verifkueshme për personat që largohen nga Zvicra dhe vazhdojnë të marrin pension jashtë vendit.