Zvicra regjistroi tetorin e dytë më të nxehtë që nga fillimi i matjeve më 1864

Pas një shtatori të ngrohtë rekord, Zvicra regjistroi tetorin e dytë më të nxehtë që nga fillimi i matjeve më 1864.

Gjysma e parë e tetorit u karakterizua nga mot jashtëzakonisht i mirë. Për gjithë muajin temperatura mesatare në të gjithë vendin ishte 9.8°C, tha të hënën Zyra Federale e Meteorologjisë dhe Klimatologjisë, MeteoSwiss, shkruan swissinfo.

Kjo është 3,1°C mbi normën mujore për periudhën 1991-2020. Rekordi i tetorit prej 10.4°C daton në vitin 2022.

Në Lugano, kantonin Ticino, tetori ishte më i ngrohti i regjistruar ndonjëherë, 2.8°C mbi normën, përcjell albinfo.ch.

Në disa vende, kur krahasohen matjet e temperaturës gjatë 100 vjetëve të fundit, tetori i vitit 2023 ishte vetëm pak nën rekordet e mëparshme. Krahasuar me periudhën paraindustriale (1871-1900), tetori i vitit 2023 ishte mesatarisht 2.7°C më i ngrohtë.

Gjatë 13 ditëve të para të tetorit, 38 lokacione në gjithë Zvicrën kanë regjistruar rekorde të temperaturës. Shumë vende përjetuan mot të ngjashëm me verën mbi 25°C. Basel-Binningen regjistroi nëntë ditë të tilla dhe Bern-Zollikofen pesë teksa kantoni Ticino, mati temperaturën më të lartë në 29.4°C më 8 tetor.

Në gjysmën e parë të muajit praktikisht nuk kishte reshje. Në datat 14-15 tetor ka rënë shi dhe borë mbi 1700 metra. Ajri i lagësht solli reshje të bollshme në Zvicrën perëndimore dhe anën jugore të Alpeve nga data 19-21 tetor. Në pjesën tjetër të Zvicrës datat 20 dhe 21 tetor ishin me lagështi. Pas 22 tetorit filloi moti i ndryshueshëm, me erëra pjesërisht të forta perëndimore në jugperëndim.

Era e Föhn përfshiu luginat në anën veriore të Alpeve në fund të muajit.