Reagimi i presidentit ukrainas pasi Trump tha se do ta përfundonte për 24 orë luftën në Ukrainë

EPA/SERGEY DOLZHENKO

Ish-presidenti amerikan, Donald Trump ka kritikuar presidentin aktual, Joe Biden për ndihmat që po i dërgon drejt Kievit, duke thënë se mund t’i jepte fund luftës në 24 orë nëse zgjidhet president i Shteteve të Bashkuara të Amerikës.

Në lidhje me këtë presidenti ukrainas, Volodymyr Zelensky ka kërkuar prej ShBA-së më shumë fonde për t’i bërë ballë Rusisë dhe ftoi ish-presidentin, Donald Trump të vizitojë personalisht Kievin.

Sipas tij, ushtarët amerikanë mund të tërhiqen në një konflikt më të gjerë evropian me Rusinë nëse Washingtoni nuk rrit mbështetjen.

“Nëse ai mund të vijë, do të më duhen 24 minuta për t’i shpjeguar presidentit Trump se si nuk mund ta menaxhojë këtë luftë. Ai nuk mund të dërgojë vendin drejt paqes për shkak të Vladimir Putinit”, ka thënë ndër të tjera Zelensky, përcjell albino.ch.

Në anën tjetër, Biden i ka bërë thirrje Kongresit amerikan të miratojë një ligj për financimin shtesë, kryesisht për forcimin e mbrojtjes së Ukrainës, por edhe për ndihmën për Izraelin, rajonin Indo-Paqësor dhe forcimin e sigurisë kufitare.