Menaxheri i Amir Rrahmanit tregon arsyet e mungesës së kapitenit të Kosovës

Keystone EPA/CIRO FUSCO

Menaxheri i Amir Rrahmanit, kapitenit të Kosovës, Adrian Aliaj, ka treguar arsyet e mungesës së tij për tri ndeshjet e nëntorit.

Aliaj ka thënë se vendimi ka qenë i përbashkët dhe ai nuk është në ndeshje pasi Kosova nuk ka ndonjë objektiv konkret, shkruan albinfo.ch.

“Vendimi ka qenë i përbashkët, mes lojtarit, trajnerit të Kosovës, Napolit dhe meje, që Amiri të mos grumbullohet kësaj radhe, meqenëse Kosova nuk ka ndonjë objektiv konkret. Herën e fundit ai u lëndua te kombëtarja dhe ende nuk e ka marrë veten mirë. Amiri ka dhënë gjithçka për Kosovën, ai e la kombëtaren e Shqipërisë për Kosovën. Nëse Kosova do të ishte duke luftuar për kualifikim, normalisht që Amiri do të vinte, por pse të mos e shohim këtë edhe nga një këndvështrim tjetër pozitiv. Pse të mos fitojë Kosova ndonjë lojtar të ri, si p.sh. Dellova?”, ka thënë Aliaj për Arlind Sadikun.